හොරොයින් සමග කතක් මාට්ටු

හොරොයින් මත්කුඩු පැකට් කරමින් සිටි කාන්තාවක්  පමුණුගම  තිස්ස මාවතේ නිවසක දී රුපියල් ලක්ෂ දෙකකට අධික වටිනා මත්කුඩු සමඟ  අත්අඩංගුවට ගත් බව අලුබෝමුල්ල පොලිසිය කියයි

අත්අඩංගුවට ගන්නා අවස්ථාවේදී සැකකාරිය සන්තකේ මත්කුඩු ග්‍රෑම් 10 මිලිග්‍රෑම් 200 ක් ,මත්කුඩු පැකට් පහළොවක් , වීදුරු කැබැල්ලක්, පැකට් කිරීමට ගන්නා කුඩා කොළ කැබලි  තොගයක්  බ්ලේඩ්   ආදිය පොලිස් භාරයට ගත් බව පොලිස් නිළධාරියෙකු පැවසීය

අත්අඩංගුවට ගත් කාන්තාව මහා පරිමාණ මත්ද්‍රව්‍ය ජාවාරම්කරුවෙක් වන “පමුණුගම කුකුල් අන්ඩාගේ” බිරිද බව පොලිසිය කියයි.

වැටලීම  කරන අවස්ථාවේ දී කාන්තාව කාමරයක්  තුළ මත්කුඩු පැකට් කරමින් සිටි බවත් පොලිස් නිලධාරීන් දැකීමත් සමගම  සැකකාරිය එම මත්කුඩු ශරීරය තුළ සඟවා ගැනීමට   දැඩි උත්සාහයක් දැරූ බව පොලිස් නිලධාරිනියක් පැවසුවාය.

මත්කුඩු ජාවාරම හේතුවෙන් දීර්ඝ කාලයක් සිර දඬුවම් විඳ මෑතකදී ඇපමත පැමිණ තිබූ සැකකාරියගේ ස්වාමි පුරුෂයා වන කුකුල් අන්ඩා නමැත්තා සැකකාරියට  මෙම මත්කුඩු ලබාදී  පැකට් කරන ලෙස පවසා තිබු බව පොලිසිය කියයි

වයස අවුරුදු හතළිස් එකක් වන සැකකාරිය පානදුර මහේස්ත්‍රාත් අධිකරණය වෙත ඉදිරිපත් කිරීමට නියමිතය